Rəşidov Zaur Firidun oğlu. Antik yunan fəlsəfəsində Sokrataqədərki dövrün tədqiqi: A.O. Makovelskinin əsərləri əsasında. Bakı, Bəxtiyar-4, 2026.

Monoqrafiyada Antik yunan fəlsəfəsinin ilk mərhələsi kimi qəbul olunan Sokrataqədərki dövrün fəlsəfi irsi tədqiq olunur. Xronoloji ardıcıllıq əsasında Sokrataqədərki fəlsəfənin doğuluşu, bu qədim tarixi mərhələnin səciyyəvi xüsusiyyətləri, “Sokrataqədərkilər” termininin mənşəyi, Antik yunan filosoflarının ilk pleyadasında Eleatlara qədərki nümayəndələr, Eleatlar dövrünün filosofları, Sokrataqədərki dövr fəlsəfəsində ilk sofistlər və Antik fəlsəfənin Klassik mərhələsinədək fəaliyyət göstərmiş Qədim yunan atomistlərinin təlimləri təhlil edilir. Mövzunun araşdırılması zamanı, XX əsrin tanınmış Azərbaycan fəlsəfə tarixçisi Aleksandr Osipoviç Makovelskinin (1884-1969) ilkin mənbələr əsasında yunan dilindən rus dilinə etdiyi silsiləvi “Sokrataqədərkilər” tərcümələrindən istifadə olunmuşdur. Monoqrafiyada Sokrataqədərki fəlsəfənin yeganə qaynağı hesab edilən Herman Dilsin fraqmentlərindən tərcümələrlə yanaşı, A.O.Makovelskinin bu dövrə aid müəyyən tədqiqatları və şərhlərinə də müraciət edilmişdir.