Orucov Ə.A.. Fəlsəfə fənni üzrə tədris proqramı. Bakı, , 2012.

Hazırkı dövrdə respublikamızın ictimai-mədəni həyatında baş verən köklü dəyişikliklər başqa sahələrdə olduğu kimi təhsil sahəsində də islahatların aparılmasını labüdləşdirir. Tarixin mənəvi mədəniyyət irsini və bu irsi yaratmış görkəmli mütəfəkkirlərin, filosofların yaradıcılığını sonrakı nəsillərə qoyduqları mənəvi sərvətlər sistemini dərk etməyən, mənimsəməyən xalq gələcək perspektivini düzgün müəyyənləşdirə bilməz. XXI əsrin əvvəllərində xalqımızın mənəvi tamlığını mənzərəsini yaratmaq baxımından görkəmli filosoflarımızın dünya fəlsəfi fikir tarixində yerlərinin, onların hansı mənəvi zəmin üzərində yüksəldiklərinin, nəhayət, Azərbaycan ictimai-fəlsəfi fikrinin sonrakı inkişafına təsirinin öyrənilməsi mühüm əhəmiyyət kəsb edir. Proqramın tərtib edilməsində başlıca məqsəd keçmiş Sovet dövründə fəlsəfənin tədqiqi və tədrisi sahəsində buraxılmış ciddi nöqsanların, təhriflərin aradan qaldırılmasının zəruriliyindən ibarətdir. Məhz, həmin dövrdə fəlsəfənin öyrənilməsinə sinfilik, partiyalılıq baxımından yanaşılmış, idealizm mövqelərindən çıxış edən filosoflar kəskin tənqid atəşinə tutulmuş, materialistlər isə tərif edilmişdir.