Hacı Niftalı Şıxlar. Zəhmətdən yoğrulmuş ömrüm I kitab. 1940-90-cı illər. Bakı, Müəllim, 2018.

Bu kitabı 60 yaşımın tamamına kimi yazıb qurtarmaq istəyirdim. Lakin mənim istədiyim kimi olmadı. Nəinki 60 yaşıma, heç 70 yaşıma da yazıb başa çatdıra bilmədim. Doğrudur, bu kitabı yaza -yaza arada bir "Coğrafiyadan testlər" (2000) metodik vəsaitini, "Quma və Məşhədə ziyarətlərimdən xatirələr" (2003), "Ömrü uzun, əməli gözəl insan" (2008), "Dünyamızın 20 yanvar faciəsi" (2010) və "Ömrümün 70 ilinin əsas tarixləri" (2010) kitablarını yazıb çap etdirdim. Baxıb gördüm ki, ömür keçib-gedir, kitab isə yazılıb qurtarmır. Fikirləşdim ki, birdən ömrüm başa çatar, kitab da yarımçıq qalar. Ona görə də belə qərara gəldim ki, əvvəlcə həyatımın 50 ilini 1990-cı ilə qədərki dövrünü yazıb, birinci kitab kimi çap etdirim, sonra da ömür vəfa edərsə, qalan işimi davam etdirərəm.